Blerim Latifi: Kur po i dëgjoj disa kastraveca të majtë duke thënë që Amerika të mos na përzihet po më kujtohen fjalët e Scrutonit

HomeAktualitet

Blerim Latifi: Kur po i dëgjoj disa kastraveca të majtë duke thënë që Amerika të mos na përzihet po më kujtohen fjalët e Scrutonit

Profesori universitar, Blerim Latifi, njëherësh edhe njohës i çështjeve politike, nëpërmjet kategorizimit të mendimtarit konservator britanik Roger Scruton për rrymën e majtë politike, ka kritikuar të majtit që kërkojnë që SHBA’ja të mos përfshihet në politikat kosovare.

Latifi, me anë të një postimi në ‘Facebook’, i ka quajtur “kastravecë” përfaqësuesit e të majtës që po kundërshtojnë prezencën diplomatike të SHBA’së në Kosovë, shkruan Gazeta Express.

“Sa herë i dëgjoj disa kastraveca të majtë që kërkojnë që SHBA-të të mos përzihen në punët e brendshme të Kosovës, më kujtohet Sir Roger Scruton, i cili të majtit i grupon në tri lloje: mashtrues, zjarrvënës dhe budallë”, ka shkruar ai.

Reagimi i tij vjen pasi Express raportoi se Admir Molla, shqiptar i cili jeton në New York e me të cilin kryeministri Kurti bisedon për raportet e Qeverisë së Kosovës me Shtetet e Bashkuara të Amerikës, i ka kërkuar Ambasadorit amerikan, Philip Kosnett, që të mos përzihet në punët e brendshme të Republikës së Kosovës.

Ambasadori i Shteteve të Bashkuara të Amerikës, Philip Kosnett, ditë më parë ka thënë se SHBA-ja beson që Kosova ka detyrim themelimin e Asociacionit të Komunave me Shumicë Serbe dhe se historia s’ka filluar me krijimin e Qeverisë Kurti. Një deklaratë e tillë e Kosnett ka nxitur reagime të shumta, derisa vetë Kurti në kundërpërgjigje, ka insistuar se Kosova s’mund të themelojë Asociacion njëetnik.

Molla ka udhëzuar Ambasadorin Kosnett që të mos përzihet në punët e brendshme të Kosovës. /Gazeta Express/

COMMENTS

WORDPRESS: 0
DISQUS: 0